اسلام آباد۔21جون(اے پی پی):عالمی بینک دے بورڈ آف ایگزیکٹو ڈائریکٹرز پاکستان اچ سماجی تحفظ اتےلائیوسٹاک دے ݙومنصوبیں سانڳے 535 ملین ڈالر دی مالی معاونت دی منظوری ݙے ݙتی اے ۔عالمی بینک توں جاری اعلامیہ موجب کرائسزریزلئنٹ سوشل پروٹیکشن (سی آر آئی ایس پی) پروگرام کیتے اضافی مالی معاونت دا مقصد ملک دے سماجی تحفظ دے نظام کوں تکڑا کرݨ تے غریب تے معاشی طور تے کمزور گھراݨے کوں مستحکم بݨاوݨ اے ۔ ایویں سندھ لائیو اسٹاک اینڈ ایکوا کلچر سیکٹرز ٹرانسفارمیشن پراجیکٹ جدید موسمیاتی تے مسابقتی نظام کوں ودھارا ݙیسی جیں توں سندھ اچ مال ڈھور تے آبی زراعت دے شعبیں اچ چھوٹے اتے درمیانے درجے دے پروڈیوسرز کوں فیدہ پڄسی ۔ پاکستان اچ عالمی بینک دے کنٹری ڈائریکٹرناجی بن حساین ݙسایا جو آفتاں نال نبݨݨ سانڳے لچک وموزونیت پیدا کرݨ اہمیت دا حامل اے جیں دے تحت سماجی تحفظ،معاشی ترقی اتے بحالی اچ معاونت کرݨ آلے شعبیں کوں تکڑا کرݨ شامل اے ۔ انہاں آکھیے جدید موسمیاتی سمارٹ ٹیکنالوجی اتے ہنگامی منصوبہ بندی دے ذریعے موسمیاتی موزونیت کوں یقینی بݨاوݨ وی ضروری اے۔ سی آر آئی ایس پی سانڳے 400ملین ڈالردی اضافی فنانسنگ کیتی ویسی جیں توں پاکستان اچ سماجی تحفظ دے نظام کوں پالیسی اتے ترسیل دے نظام دی بنیاداں نال آراستہ کرݨ دیاں جاری کوششاں کوں تقویت ملسی۔
